Марказҳои Иёлоти Муттаҳида оид ба назорат ва пешгирии бемориҳо (CDC/CAR) барои ҳукуматҳои Осиёи Марказӣ дар мубориза бо бемории COVID-19 6,8 миллион доллар, аз ҷумла 1,69 миллион доллар барои Тоҷикистон, ҷудо мекунанд. Кӯмаки мазкур илова ба маблағи як миллион доллари амрикоӣ, ки ҳамчун кӯмак аз ҷониби ЮСАИД барои дастгирии кӯшишҳои Тоҷикистон дар самти мубориза бо сар задани COVID-19 пешниҳод шудааст, мебошад.
Намояндагиҳои CDC дар Осиёи Марказӣ маблағҳои навбатиро барои рафъи эҳтиёҷот ва камбудиҳои амалие, ки кормандони CDC дар ҳамкорӣ бо ҳукуматҳои маҳаллӣ муайян кардаанд, истифода хоҳанд кард. Ба онҳо хариди лавозимот ва таҷҳизоти лабораторӣ барои санҷиши COVID-19, ташкили тренингҳо барои кормандони тибби давлатӣ, расонидани кӯмаки техникӣ барои фаъолиятҳои марзбонӣ, инчунин таҳия ва татбиқи протоколҳои клиникӣ дохил мешаванд.
«Мо аз моҳи январи соли ҷорӣ ҳолати COVID-19-ро дар Осиёи Марказӣ бодиққат назорат карда истодаем ва ба ҳукуматҳои минтақа барои дастгирии вокунишашон ба авҷи COVID-19 кӯмаки техникӣ пешниҳод кардем», – қайд намуд директори CDC дар Осиёи Марказӣ доктор Даниэл Сингер. «Ин маблағҳо ба мо имкон медиҳанд, ки тадбирҳоеро, ки аз ҷониби кишварҳо барои паст кардани паҳншавии вирус андешида мешаванд, тақвият диҳем. Он ба кори деринаи минтақавии CDC дар самти мубориза бо ВНМ ва сил ва омодагӣ ба зукому дигар бемориҳои пандемия, асос меёбад. Сармоягузории CDC барои беҳтар кардани амнияти тандурустӣ, барои омодагии зуд ва самаранок ба таҳдидҳои пайдошуда, аз ҷумла авҷи ҷории коронавирус замина гузошт. Мо чунин мешуморем, ки ҳамкории мо бо вазоратҳои тандурустӣ аз ҳарвақта дида, муҳимтар аст.” Сафири Иёлоти Муттаҳида дар Тоҷикистон Ҷон Марк Поммершайм изҳор дошт, ки “ин кӯмак ба мардуми Тоҷикистон ва кормандони қаҳрамони тибби он, дар рафъи ин бӯҳроне, ки дар тамоми гӯшаву канори олам зарар расонидааст, мусоидат хоҳад кард. Сафорати ИМА дар тӯли 20 соли охир ба Тоҷикистон тақрибан 125 миллион доллар кӯмаки тиббӣ расонидааст, то тавоноии Тоҷикистонро дар вокуниш ба бӯҳронҳои ба ин монанд афзоиш диҳад. “
Марказҳои Иёлоти Муттаҳида оид ба назорат ва пешгирии бемориҳо (CDC/CAR) аз оғози пайдоиш вазоратҳои тандурустии Осиёи Марказиро тавассути ташкили тренингҳо ва расонидани кӯмаки техникӣ оид ба амалиётҳои таъҷилӣ, амалиётҳои лабораторӣ, пешгирӣ ва мубориза бо сироят, муоина дар бандарҳои вуруд, иртиботи хавф ва ҷалби ҷомеа, инчунин назорати бемориҳо дастгирӣ мекунад. Илова бар ин, онҳо ҳуҷҷатҳои роҳнамои техникиро, ки аз ҷониби ташкилотҳои пешбари байналмилалии тандурустӣ нашр шудаанд, ба забони русӣ тарҷума кардаанд.
CDC таърихи тӯлонии ҳамкорӣ бо ҳукуматҳои Осиёи Марказӣ дар соҳаи тандурустии ҷамъиятӣ дорад. CDC аввалин дафтари худро дар Алмаато соли 1995 ифтитоҳ кард ва имрӯз дар Қазоқистон, Қирғизистон, Узбакистон ва Тоҷикистон дафтар дорад. CDC бо ҳар як Вазорати тандурустӣ барои таҳкими лаборатория, назорати бемориҳо ва қувваи корӣ фаъолият мекунад, то кишварҳо пешгирӣ, ошкор ва вокуниш ба авҷгирии бемориҳоро беҳтар кунанд.
